Sunday, 28 July 2019

أزمة وجودية

ليس على هذه الأرض ما يستحق الحياة، هنالك فقط ما يجعلها أقل قتامة!

 
 
 و.

Monday, 17 September 2018

دينار

اليوم لقيت هالدينار بمحفظتي. فقررت أحترم طلب الدعوة بإني على الأقل ما أدفعه كجزء من ثمن فنجان قهوة مبالغ بسعرها في بلد قتلها الجشع. رجعت الدينار عالمحفظة وحاسبت بغيره. ورجعت عطاولتي مبسوطة وكإنه في حدا بعتلي رسالة شخصية بطريقة مبتكرة، وبنفس الوقت كنت عم بحاول أسيطر على المدقق اللغوي اللي عايش جواتي واللي كان بهديك اللحظة حابب  يضيف ألف بأول الكلمة (أقل ما فيها)!!!





"#إدع_لي"
"#إدع_لنفسك"




Monday, 23 July 2018

فن الحرب (1)

“Victorious warriors win first and then go to war, while defeated warriors go to war first and then seek to win” ― Sun Tzu, The Art of War



من كتاب فن الحرب لسون تزو: "المحاربون المنتصرون يفوزون أولاً ثم ينتقلون للحرب ، بينما يذهب المحاربون المهزومون للحرب أولاً، ومن ثم يسعون للفوز".
كتب هذا الكتاب سنة 512 قبل الميلاد من قبل المفكر الاستراتيجي تزو، والذي وضع فلسفته الحربية في 13 مقال. لا يزال هذا الكتاب يعتبر كتابا مقدسا في الدراسات العسكرية. فكان لفكره الأثر الكبير على نابليون بونابارت، والقادة العسكريين الألمان. كما وتمت دراسته في غزو العراق عام 2003.
بينما كنت أقرأ هذا الكتاب لم يسعني إلا أن أتذكر شابا منتسبا لأحد الجيوش العربية في مقابلة تلفزيونية، حيث صرح بأن أحد الأسباب الرئيسية لانضمامه للجيش هو أنه وجد في هذه الخطوة فرصة مناسبة جدا لإنقاص وزنه.
#قصص_من_العالم_الثالث

Monday, 25 June 2018

مجتمع فاسد

س: وشو الحل؟

ج: مبدئيا لازم يكون في تدخل إلهي على شكل كارثة طبيعية من نوع ما (زلزال، بركان، عاصفة) تاخد ال 80% العاطلين. بعدين احنا بنسيطر وبنعمل مجتمع فضيلة!

Tuesday, 8 August 2017

فلسفات صباحية (1)



انا ما بعمل منيح مشان أروح عالجنة... ما بعرف إزا طبيعي هيك بس أنا مو قادرة أتخيل السعادة بالجنة أصلا... تفكيري أصغر من استيعاب مواصفات مكان زي هيك، يمكن لأني عم بفكر فيها بعقل دنيوي بيعتقد أن استشعار السعادة يكون بعد المشقة والحزن، وبما إنه مافي مشقة وحزن بالجنة، كيف رح أستشعر السعادة هناك على فترات طويلة أو لا متناهية؟

المهم، بغض النظر عن تساؤلاتي عن الجنة والسعادة، أنا بعتقد إنه لازم نبلش نبعد عن فكرة العمل الدنيوي لطلب الجنة في الآخرة، ونصير نعمل الصح إرضاءً لرب بحبنا وبدنا نكسب رضاه فقط لفكرة المحبة المتبادلة بينا...

لما أشوف كيف الناس بتحسب حساب الحرام والحلال لربطها فقط بفكرة الجنة والنار، بحزن إنه حددنا تفكيرنا بالله بهدول المفهومين... الرغبة والخوف مشاعر إنسانية فطرية طبيعية، بس الرقي بكون لما نتطور من مرحلة الفطرة والغريزة إلى مرحلة التفكر....

"...لعلهم يتفكرون"

و.

Saturday, 1 July 2017

لحتى الله يفرجها

في شياطين ساكنة جوة مخي... تعلمت أحاربها... مرة بتكون الحرب نشطة ومرة سلبية، المهم عم بحارب طول الوقت. 

الحرب اللي مع نفسك أوقات بتكون أصعب من الحرب اللي بتكون مع ناس تانيين، لأنها مرهقة فكريا ونفسيا قبل ما تكون مرهقة جسديا. لازم تحارب وبنفس الوقت تحافظ على مظهر "طبيعي" أو أقرب للطبيعي قدام الناس اللي بتعرفك ومتعودة عليك كإنسان "قوي" و"مبسوط بحياتك"... ما أتوقع في شي ممكن يقنع الناس اللي بيعرفوني إنه ورا ابتسامتي اليومية في حرب عم تترك وراها جرح كبير ما بعرف إزا عمره رح ينتسى. 

الإرهاق عم ياكلني من جوة... وحتى لو بتيجي ساعات برتاح فيها شوي، بنسى، أو بالأحرى بتناسى، بآخر اليوم كل شي بزكرني بإني علقانة بحياة حاسستها مش إلي، أو يمكن هالحياة إلي، بس أنا مش عم بتحرك فيها... حاسة الحياة عم تمشي وأنا بتفرج ، براقبها منيح مشان الخطوة الجاي، بس هالخطوة مش عم تيجي.. دائما عم بستنى... عم بستنى ربنا يحكيلي شو لازم أعمل، أو ما أعمل... أوقات بتنقطع الرسائل وبحس حالي عم بضيع... وأوقات بعمل إشيا مو فاهمتها بس لأنه "الله هيك حكالي مبارح بالليل"... الإشي الأصعب أنه الناس ما عم تستوعب قراراتي اللي شكلها الخارجي فعلا غير منطقي، وأنا تعبت من ردة الفعل لما بحكي للناس انو "ربنا هيك بده"... هالإيام عم بغمغم الجواب وبحكي: "هيك أحسن"، "أنا بدي هيك"، أو "صار معي إشي ومو حابة أحكي فيه، بس قررت هالقرار على أساسه". أنا نفسي ما بقتنع بالأجوبة اللي عم بعطيها للناس، بس ما عندي حلول أخرى بالظروف الحالية. 

بعرف إني لازم أفرح لإنه عم باخد كل هالتوجيه، بس أوقات عم بضعف وبشك بحالي، بإيماني، وبكل شي حولي. وبعرف أنه ربنا ما بحمل حدا أكتر من طاقته، فيمكن تكون نظرة ربنا لقوتي مختلفة عن نظرتي لحالي.

بتيجي كل هالأسئلة والشك بساعة ضعف زي هاي الساعة، وقتها الحرب بتكون في أوجها... بس بالآخر بحكي لازم ما أفكر وأحلل كتير مشان أعرف أكمل... 

لإيمتى؟



لحتى الله يفرجها...

و.

Tuesday, 27 June 2017

رسائل إلى الله (الحمد لك)



عزيزي الله؛

شكرا على حديثك معي ليلة البارحة. وصلتني رسالتك بوضوح، وقد فعلت ما أمرت به فتقبل مني يا رحيم. أرجوك بكل اسم هو لك أن تسهل علي المرحلة القادمة فأنت أعلم بضعفي رغم إيماني. أرجوك بكل ما أوتيت من حزن أن تعوضني خيرا مما تركت لك.

أحب حديثك معي فيا ليتك تزيد من ليالي وصلي.

و.