بما إني بطبيعة شغلي بقضي أوقات طويلة عم
بسوق من مكان لمكان بشوارع عمان العريقة، في أكمن شغلة بحب أشاركهم مع زملائي
المشاة والسواقين. لأصحاب الأذواق الرفيعة في شوارع عمان-الأردن:
+ مش عادي تقطع الشارع من تحت جسر المشاة على
أقل من مهلك و تجحرني إزا أنا تجرأت و زمرتلك مشان تستعجل شوي.
+ عيب تزمرلي لأني بطأت سرعتي مشان أسمح لحجة
بعمر أمك إنها تقطع الشارع، أو أمرِق سيارة عم بسوقها زلمة بعمر سيدك.
+ عادي تستعمل الغمازات لما تتزكر إنك بدك
تغير اتجاه سيارتك بزاوية 45 درجة فما فوق.
+ لما أنا أبطئ سرعتي مشان تمرق بسيارتك
الفخمة، أنا عم بساوي هيك لأني بنت أصل، مش لأني خايفة منك أو من سيارتك اللي
حجمها ضعف حجم سيارتي. بس لما انت تمرق و ما تغلب حالك حتى تتفرج علي تقديراً لأني
مرقتك، فهدا بالتأكيد لأنك انت مش ابن أصل... و بالآخر كل واحد أصله بِرُدُه.
+ العب بموبايلك زي ما بدك وانت سايق، بس بلاش
يكون هدا هوة سبب إنك تسوق على سرعة 20 بنص شارع ديِق و ماتخلي الناس تتجاوز عنك.
+ وعسيرة التجاوز، ما تتجاوز عن يميني.
+ وكمان عسيرة التجاوز، لما أنا أبطئ أو حتى
أوقف لأنو في مشكلة بالشارع ، وانت تقرر تتجاوز عني لأنك أقدع مني ورح تعرف تحلِق
بسيارتك (بغض النظر إنو الشارع ديِق وكمان two ways، ولما انت
بتتجاوز فعليا بتسكر المسرب التاني)، الاحتمال الأكبر هوة إنك رح تزيد المشكلة
بالشارع و رح تعطل السير لفترة أطول من اللي كانت متوقعة قبل ما تعمل حركتك
الذكية. فحبذا لو بتضلك مكانك و بتستنى زي العالم والناس، بلاش حداقة!
ودامت الأفراح حليفة شوارعكم العامرة.
No comments:
Post a Comment